zerdiok

Dakidana da dakizuna

zerdiok — Mon, 13 Feb 2012 23:49:12 +0000

Ezin esan ez dakizunik.
Dakidan oro esan dizut.
Badakizu.
Badakit ulertzen dudan oro.
Ulertzen ez dudana ere badakit.
Eta saiatu naiz esaten.
Eta ezin.
Badakizu
ezin diezazuket esan
ez baitut ulertzen
dakidana
ez baitakit esaten
ulertezintzat dudana.
Badakit eta badakizu.
Asmakizun bat izaten darraizu nire bihotzean.

Berandu da

zerdiok — Sat, 28 Jan 2012 01:10:49 +0000

Hanketako hezurrek jasango dutela ez dakizula, zeurekoi gizendutako haragi kilo bakoitzaren zama. Pausuak belaunekin egiten dituzula, lurra bustita dagoela ikusiz. Lehenago euria egin du. Zinematik irten zara, San Telmoren begietara, eta jende artean zoaz. Bazoaz.
Honezkero badira 00:00ak. Kanpaikadak ez entzunagatik ere badakizu. Ez du bateriarik zure HTC madarikatuak.
Bazoaz.
Eta etxera iritsiko zara.
Zapatak kentzearen erritoa bete. Hankak libratu.
Sofan jesarri, berriz ixiltasunean.
Eta errepikatuko diozu zeure buruari.
Geroz eta goizago zoaz ohera.

Argazkia cc by sa: http://almablog.blogspot.com

Arkansas

zerdiok — Wed, 25 Jan 2012 20:11:53 +0000

Anonimoa

zerdiok — Mon, 23 Jan 2012 01:28:16 +0000

Loarekin zorretan zaudela,
kafea mahai gainean,
gauerdia aspaldiko kontua balitz bezala.
Argiak hori direnean.
Zerua iluna.
Kalefakzioak hitz egiten dutenean.
Ixiltasuna zarata txikiz
osatuta dagoela
konturatzen zarenean.
Loarekin zorretan zaudela.
Nekeak begirada
lausotzen dizula,
zure gogoa
urrun galduta,
anonimoak dira kezkak.
Anonimoak beldurrak,
lotsak, penak.
Anonimoa zara,
loarekin zorretan.

http://www.flickr.com/photos/daidaros/522820951/sizes/l/in/photostream/

Megaupload

zerdiok — Sat, 21 Jan 2012 21:25:21 +0000

Pelikulak igoko ditut
eta deskargatzeko jarri.
Denen eskura.
Bi anai,
Ander,
Behiak,
Eutsi!
Eta musika mordoa.
Kultura librearen izenean
Copyright-a birrinduko dut.
Ruper, Lertxundi eta
Ken Zazpi igo. Su ta Gar!
Ez ditut deportiboak
eta hegazkin pribatuak erosiko.
Ez dut paradisu fiskalik beharko.
Ez naiz aberastuko.
Ez nau FBIk itxiko.

Svefn-G-Englar

zerdiok — Tue, 17 Jan 2012 10:54:19 +0000

Segunduak dira.

zerdiok — Thu, 05 Jan 2012 21:48:01 +0000

Eguzkia ateratzen denean,
bakarrik olatu bat argitzeko.
Eta begiratzen duzu
argia itzaltzen den bitartean.
Segunduak dira.
Hiru edo lau.
Ur ertzeko ehiztariak harrapatu du.
Zuri ahaztu egingo zaizu.
Eskuak poltsikoan sartu eta
ekialdera itzultzean.

Esku hotzen itsasoan

zerdiok — Mon, 02 Jan 2012 23:25:37 +0000

Poltsikoak esku hotzez beteta.
Hustuko ditut.
Eta aterako dira esku gehiago.
Eta hustuko ditut.
Eta gehiago aterako dira.
Bizkarretik igoko direnak,
zilborretik,
titiartetik,
lepoa estutzera.
Eta ez naiz esnatuko.
Esku hotzen itsasoan itoko naiz.
Atzazal artean,
harramazkatuta.

2012

zerdiok — Sun, 01 Jan 2012 19:48:51 +0000

Poltsikoak esku hotzez beteta.
Arrangura ez da kabitzen oihalaren
zirrikituetatik.
Ez zara urtzen azkazaletatik.
Itsasoaren arrastoak hor diraute.
Etxera daramatzazu hondar aleak.
Zolan.
Urte berria da.
Baina oraingoz aurreko urtearen
oso antzekoa.
Zoritxarrez.

Garbitu naute

zerdiok — Sat, 31 Dec 2011 00:24:48 +0000

Berririk ez.
Gaur ere hondartza niretzat hartu nahi izan dut.
Besoak zabaldu.
Begiak itxi ortzemugari.
Itsasoari aditu.
Ulertzen dudala egin.
Pasa.
Utzi.
Eta itxaron.
Baina inork ez nau besarkatu.

Gaur garbitu dute kosta.
Garbitu naute.